ఉగ్రవాదాన్ని ఎదుర్కొనే విషయంలో భారత్ తీసుకున్న దృఢ నిర్ణయాలు, దేశ భద్రత పరిరక్షణలో ఉన్న అచంచల నిబద్ధతకు ‘ఆపరేషన్ సిందూర్’ ప్రతీకగా నిలిచిందని ప్రధానమంత్రి నరేంద్ర మోదీ పేర్కొన్నారు. ఈ ఆపరేషన్కు ఏడాది పూర్తైన సందర్భంగా ఆయన ‘ఎక్స్’ వేదికగా స్పందిస్తూ సాయుధ దళాల ధైర్యసాహసాలను ప్రశంసించారు.
ఏడాది క్రితం ఇదే రోజున భారత సాయుధ దళాలు అపార ధైర్యం, అచంచల సంకల్పం, అత్యంత కచ్చితత్వంతో ‘ఆపరేషన్ సిందూర్’ను విజయవంతంగా నిర్వహించాయని మోదీ తెలిపారు. పహల్గాంలో అమాయక భారతీయుల ప్రాణాలను బలిగొన్న ఉగ్రవాదులకు ఈ ఆపరేషన్ గట్టి సమాధానంగా నిలిచిందన్నారు. సైన్యం ప్రదర్శించిన శౌర్యం, పరాక్రమం దేశానికి గర్వకారణమని ఆయన పేర్కొన్నారు.
ఈ చర్య ద్వారా ఉగ్రవాదంపై భారత్ తీసుకున్న కఠిన వైఖరి మరింత బలంగా ప్రపంచానికి తెలియజేయబడిందని మోదీ అన్నారు. దేశ భద్రతను కాపాడడంలో భారత దళాల నిబద్ధత, సిద్ధత, సామర్థ్యం, సంకల్పబలం ఎంత ఉన్నతంగా ఉందో ‘ఆపరేషన్ సిందూర్’ ద్వారా మరోసారి స్పష్టమైందని చెప్పారు.
రక్షణ రంగంలో స్వావలంబన సాధించేందుకు కేంద్ర ప్రభుత్వం చేపడుతున్న చర్యలు సానుకూల ఫలితాలు ఇస్తున్నాయని, ఇవి దేశ భద్రతను మరింత బలోపేతం చేస్తున్నాయని ప్రధాని వివరించారు. ఉగ్రవాదులు మరియు వారికి మద్దతు ఇచ్చే శక్తులపై కఠిన చర్యలు కొనసాగుతాయని కూడా హెచ్చరించారు.
ఇక ‘ఆపరేషన్ సిందూర్’ విజయానికి గుర్తుగా కేంద్ర ప్రభుత్వం కొత్త లోగోను రూపొందించింది. గతంలో విడుదల చేసిన లోగోకు అదనంగా పైభాగంలో భారత త్రివర్ణ పతాకాన్ని చేర్చారు. ఈ లోగోను ప్రధాని మోదీతో పాటు పలువురు కేంద్ర మంత్రులు, రాజకీయ నాయకులు తమ సామాజిక మాధ్యమ ఖాతాల్లో ప్రొఫైల్ చిత్రంగా ఉపయోగిస్తున్నారు.
