వాషింగ్టన్: రష్యాపై మరింత కఠిన ఆర్థిక ఆంక్షలు విధించే బిల్లుకు అమెరికా సెనెట్ ఆమోదం తెలిపింది. రష్యా నుంచి చమురు, సహజ వాయువు వంటి ఇంధన వనరులను కొనుగోలు చేస్తున్న దేశాలపై గరిష్ఠంగా 100 శాతం దిగుమతి సుంకాలు విధించే అధికారాన్ని అమెరికా అధ్యక్షుడికి కల్పించే నిబంధనలు ఈ బిల్లులో ఉన్నాయి.
రిపబ్లికన్ సెనెటర్ లిండ్సే గ్రాహమ్, డెమోక్రటిక్ సెనెటర్ రిచర్డ్ బ్లూమెంటాల్ రూపొందించిన ఈ బిల్లుకు సెనెట్లో జరిగిన ఓటింగ్లో 86-12 ఓట్లతో మద్దతు లభించింది. అయితే ఇది ఇంకా చట్టంగా అమల్లోకి రాలేదు. సెనెట్లో మిగిలిన శాసన ప్రక్రియ పూర్తయ్యాక ప్రతినిధుల సభ ఆమోదం పొందాలి. అనంతరం అమెరికా అధ్యక్షుడు సంతకం చేస్తేనే ఇది చట్టంగా మారుతుంది.
ప్రస్తుతం భారత్ రష్యా నుంచి గణనీయ స్థాయిలో ముడి చమురును దిగుమతి చేసుకుంటోంది. ఈ బిల్లు అమల్లోకి వస్తే, రష్యా నుంచి ఇంధన దిగుమతులు కొనసాగించే ప్రధాన దేశాలపై గరిష్ఠంగా 100 శాతం వరకు సుంకాలు విధించే అవకాశం ఉంటుంది. అయితే ఆ సుంకాలను ఎప్పుడు, ఏ దేశంపై, ఎంత మేరకు అమలు చేయాలనే తుది నిర్ణయం అమెరికా అధ్యక్షుడి విచక్షణాధికారంలో ఉంటుంది.
రష్యా–ఉక్రెయిన్ యుద్ధానికి ఆర్థిక వనరులు అందకుండా చేయడమే ఈ బిల్లు ప్రధాన ఉద్దేశమని అమెరికా పేర్కొంటోంది. చమురు, సహజ వాయువు ఎగుమతుల ద్వారా రష్యాకు లభించే ఆదాయాన్ని తగ్గించడం ద్వారా మాస్కోపై మరింత ఒత్తిడి తీసుకురావాలని అమెరికా చట్టసభ్యులు భావిస్తున్నారు. ఈ బిల్లులో రష్యాతో పాటు ఇరాన్పై అదనపు ఆంక్షలకు సంబంధించిన నిబంధనలు కూడా ఉన్నాయి.
